–రాష్ట్రవ్యాప్తంగా లక్ష జాతీయ జెండాల పంపిణీకి MHPS శ్రీకారం
–“కులమతాలకు అతీతంగా దేశ ఐక్యతను చాటుదాం” రాష్ట్ర అధ్యక్షులు మహమ్మద్ ఫారూఖ్ షిబ్లీ
సలాం ప్రొద్దుటూరు (విజయవాడ):
దేశభక్తి, జాతీయ సమైక్యత, సాంస్కృతిక సామరస్యాన్ని ప్రజల్లో మరింత బలోపేతం చేయాలనే సంకల్పంతో మైనారిటీ హక్కుల పరిరక్షణ సమితి (MHPS) ఆధ్వర్యంలో “ఘర్ ఘర్ తిరంగా” కార్యక్రమానికి ఘనంగా శ్రీకారం చుట్టారు. MHPS రాష్ట్ర అధ్యక్షులు, వ్యవస్థాపకులు మహమ్మద్ ఫారూఖ్ షిబ్లీ నేతృత్వంలో మొగల్రాజపురంలోని సదర్న్ స్పైస్ కాన్ఫరెన్స్ హాలులో జరిగిన రాష్ట్ర కార్యవర్గ సమావేశంలో ఈ కార్యక్రమాన్ని ప్రారంభించారు.రాష్ట్రవ్యాప్తంగా లక్ష జాతీయ జెండాలను పంపిణీ చేసి, ప్రతి ఇంటిపై త్రివర్ణ పతాకం రెపరెపలాడేలా చేయడం కార్యక్రమం ప్రధాన లక్ష్యమని షిబ్లీ తెలిపారు. దేశ స్వాతంత్ర్య పోరాట స్ఫూర్తిని, జాతీయ ఐక్యతను, సోదరభావాన్ని ప్రతి కుటుంబానికి చేరువ చేయాలనే ఉద్దేశంతో “ఘర్ ఘర్ తిరంగా” కార్యక్రమాన్ని విస్తృతంగా నిర్వహిస్తున్నట్లు చెప్పారు.“ప్రతి ఇంటిపై జాతీయ జెండా రెపరెపలాడాలి.. ప్రతి హృదయంలో దేశభక్తి వెలుగొందాలి” అని షిబ్లీ పిలుపునిచ్చారు. త్రివర్ణ పతాకం కేవలం ఒక జెండా మాత్రమే కాదని, భారతదేశ సార్వభౌమత్వానికి, స్వాతంత్ర్య స్ఫూర్తికి, జాతీయ గౌరవానికి, భిన్నత్వంలో ఏకత్వానికి ప్రతీక అని పేర్కొన్నారు.
దేశం కోసం.. ధర్మం కోసం.. ఐక్యత కోసం
కులం, మతం, ప్రాంతం, భాషలకు అతీతంగా భారతీయులందరినీ ఒక్కటిగా నిలబెట్టే శక్తి జాతీయ పతాకానికి ఉందని MHPS నాయకులు పేర్కొన్నారు. “ధర్మం కోసం — దేశం కోసం” అనే స్ఫూర్తితో ప్రతి ఒక్కరూ “ఘర్ ఘర్ తిరంగా” కార్యక్రమంలో భాగస్వాములు కావాలని షిబ్లీ కోరారు.జాతీయ గీతానికి, జాతీయ పతాకానికి గౌరవం చూపడంతో పాటు పరస్పర మత విశ్వాసాలు, సాంస్కృతిక సంప్రదాయాలను గౌరవించుకోవడం ద్వారా దేశంలో సోదరభావం మరింత బలపడుతుందని ఆయన అన్నారు. భారత రాజ్యాంగం ప్రసాదించిన సమానత్వం, సౌభ్రాతృత్వం, జాతీయ సమైక్యత విలువలను ప్రజల్లోకి తీసుకెళ్లడం ప్రతి ఒక్కరి బాధ్యతగా పేర్కొన్నారు.
ఒక్కొక్కరికి 200 జాతీయ జెండాలు
MHPS రాష్ట్ర కార్యవర్గ సమావేశానికి రాష్ట్రవ్యాప్తంగా సుమారు 500 మంది నాయకులు, సభ్యులు హాజరయ్యారు. కార్యక్రమంలో పాల్గొన్న ప్రతి ప్రతినిధికి 200 జాతీయ జెండాలను అందజేశారు. తమ ప్రాంతాల్లోని ప్రతి ఇంటికీ జాతీయ జెండాను చేరవేసి, ప్రజలను కార్యక్రమంలో భాగస్వాములను చేయాలని సూచించారు.రాష్ట్రవ్యాప్తంగా “ఘర్ ఘర్ తిరంగా” కార్యక్రమాన్ని ప్రజల భాగస్వామ్యంతో విజయవంతం చేయడంతో పాటు, MHPS సభ్యత్వ నమోదు కార్యక్రమాన్ని కూడా మరింత విస్తృతంగా చేపడుతున్నట్లు షిబ్లీ తెలిపారు.
ప్రొద్దుటూరు MHPSకు నూతన నాయకత్వం
ప్రొద్దుటూరు MHPS నూతన అధ్యక్షుడిగా ఎన్నికైన అచ్చుకట్ల అసిఫ్ కు ఈ సందర్భంగా నాయకులు అభినందనలు తెలిపారు. అతి త్వరలో ప్రొద్దుటూరు MHPS నూతన కమిటీని ఏర్పాటు చేసి, సంస్థ కార్యకలాపాలను మరింత విస్తృతంగా ప్రజల్లోకి తీసుకెళ్లనున్నట్లు తెలిపారు.ఈ కార్యక్రమంలో వక్ఫ్ బోర్డు డైరెక్టర్ బేపారి జాకీర్ అహమ్మద్, జామియా మసీదు సెక్రటరీ బేపారి ఆరీఫ్ అహమ్మద్, ప్రొద్దుటూరు MHPS అధ్యక్షులు అచ్చుకట్ల అసిఫ్, మాదురు మున్నా, షేక్ మదనపల్లి ఇనాయతుల్లా, వరపకుల ఖాదర్ బాషా, నూర్, అలీ, చంద్ బాషా, MHPS ప్రతినిధులు, మత పెద్దలు తదితరులు పాల్గొన్నారు.
త్రివర్ణం ప్రతి ఇంటా.. దేశభక్తి ప్రతి గుండెలో — ఇదే “ఘర్ ఘర్ తిరంగా” లక్ష్యం అని MHPS నాయకులు స్పష్టం చేశారు.
