–వాటర్ ట్యాంక్, పైప్లైన్లను స్వయంగా పరిశీలించిన తూతిక శ్రీనివాస విశ్వనాథ్..
–మున్సిపల్ సరఫరా నీరు స్వచ్ఛమేనని స్పష్టీకరణ
సలాం ప్రొద్దుటూరు:
మోడంపల్లి ప్రాంతంలో కలుషిత తాగునీరు సరఫరా అవుతోందన్న ఫిర్యాదుపై ప్రొద్దుటూరు మున్సిపల్ కమిషనర్ తూతిక శ్రీనివాస విశ్వనాథ్ తక్షణమే స్పందించారు. ప్రజల ఆరోగ్యానికి సంబంధించిన ఫిర్యాదును అత్యంత ప్రాధాన్యతగా తీసుకుని, మున్సిపల్ సిబ్బందితో కలిసి మోడంపల్లి వాటర్ ట్యాంక్ను క్షేత్రస్థాయిలో పరిశీలించారు.ఫిర్యాదు అందిన వెంటనే వాటర్ ట్యాంక్ నుంచి సరఫరా అవుతున్న నీటిని పరీక్షించడంతో పాటు, ఫిర్యాదు చేసిన కుటుంబం నివసిస్తున్న ఇంటికి స్వయంగా వెళ్లి అక్కడి వాటర్ ట్యాంక్, పైప్లైన్ వ్యవస్థ, నీటి నిల్వ పరిస్థితులను పరిశీలించారు. ఈ సందర్భంగా ఇంటి వద్ద ఉన్న వాటర్ ట్యాంక్ నిర్వహణ, పైప్లైన్ల పరిస్థితి, ట్యాంక్ శుభ్రతకు సంబంధించిన అంశాలను అధికారులు పరిశీలించారు.క్షేత్రస్థాయి పరిశీలన అనంతరం పురపాలక సంఘం ద్వారా సరఫరా అవుతున్న తాగునీటిలో కలుషితం ఉన్నట్లు ఎలాంటి ఆధారాలు కనిపించలేదని, నీటి సరఫరా వ్యవస్థలోని అన్ని దశల్లోనూ నీటి స్వచ్ఛత ఉన్నట్లు నిర్ధారణ అయిందని కమిషనర్ స్పష్టం చేశారు.
ఫిర్యాదుపై నిర్లక్ష్యం ఉండదు: కమిషనర్
ప్రజల నుంచి వచ్చే ప్రతి తాగునీటి ఫిర్యాదును పురపాలక సంఘం తీవ్రంగా పరిగణిస్తుందని కమిషనర్ తూతిక శ్రీనివాస విశ్వనాథ్ తెలిపారు. ప్రజల ఆరోగ్య భద్రత విషయంలో ఎలాంటి రాజీ ఉండదని, ఫిర్యాదు అందిన వెంటనే వాస్తవ పరిస్థితిని క్షేత్రస్థాయిలో పరిశీలించి అవసరమైన చర్యలు తీసుకుంటామని స్పష్టం చేశారు.
“ప్రజలకు సరఫరా చేసే తాగునీటి విషయంలో పురపాలక సంఘం పూర్తి బాధ్యతతో వ్యవహరిస్తుంది. నీటి నాణ్యతపై ప్రజల్లో ఎలాంటి అనుమానాలు లేదా ఆందోళనలు తలెత్తినా వాటిని వెంటనే పరిశీలిస్తాం. ప్రజల ఆరోగ్యానికి భంగం కలిగించే పరిస్థితిని ఎట్టి పరిస్థితుల్లోనూ అనుమతించం” అని కమిషనర్ స్పష్టం చేసినట్లు తెలిపారు.
మోడంపల్లి ప్రజలకు భరోసా
మోడంపల్లి ప్రాంత ప్రజలు పురపాలక సంఘం ద్వారా సరఫరా అవుతున్న తాగునీటిని నిర్భయంగా వినియోగించుకోవచ్చని కమిషనర్ భరోసా ఇచ్చారు. అదే సమయంలో ప్రతి ఇంటిలోని వాటర్ ట్యాంకులను క్రమం తప్పకుండా శుభ్రపరచుకోవాలని, ఇంటి పరిధిలోని పైప్లైన్లను కూడా సక్రమంగా నిర్వహించుకోవాలని ప్రజలకు సూచించారు.ప్రజలకు స్వచ్ఛమైన, సురక్షితమైన తాగునీరు అందించడం పురపాలక సంఘం అత్యంత ముఖ్యమైన బాధ్యత అని ఆయన పేర్కొన్నారు. ప్రభుత్వ లక్ష్యాలకు అనుగుణంగా “ప్రజారోగ్యం–సురక్షిత తాగునీరు” అంశాలకు అత్యధిక ప్రాధాన్యత ఇస్తూ నీటి సరఫరా వ్యవస్థను నిరంతరం పర్యవేక్షిస్తున్నామని తెలిపారు.ఫిర్యాదు అందిన వెంటనే అధికారులు క్షేత్రస్థాయికి చేరుకుని నీటి సరఫరా వ్యవస్థను పరిశీలించడం ద్వారా ప్రజలకు వాస్తవ పరిస్థితిపై స్పష్టత కల్పించారు. ప్రజల నుంచి వచ్చే ప్రతి ఫిర్యాదును పరిష్కార దిశగా తీసుకెళ్లడమే తమ లక్ష్యమని కమిషనర్ స్పష్టం చేశారు.
