–రాచమల్లు వ్యాఖ్యలపై టీడీపీ మాజీ ఇన్‌చార్జ్‌ డాక్టర్‌ జి.వి. ప్రవీణ్‌కుమార్‌ రెడ్డి ఘాటు స్పందన
సలాం ప్రొద్దుటూరు:
స్థానిక వ్యాపారుల ప్రయోజనాలను కాపాడటమే తెలుగుదేశం పార్టీ ప్రధాన లక్ష్యమని, ప్రొద్దుటూరులో స్థానిక చిన్న, మధ్య తరహా వ్యాపారాలను దెబ్బతీసే భారీ షాపింగ్‌ మాల్స్‌ ఏర్పాటుకు తాను పూర్తిగా వ్యతిరేకమని టీడీపీ మాజీ ఇన్‌చార్జ్‌ డాక్టర్‌ జి.వి. ప్రవీణ్‌కుమార్‌ రెడ్డి స్పష్టం చేశారు.శుక్రవారం ప్రొద్దుటూరు వైఎంఆర్‌ కాలనీలోని తన కార్యాలయంలో నిర్వహించిన విలేకరుల సమావేశంలో మాజీ ఎమ్మెల్యే రాచమల్లు శివప్రసాద్‌రెడ్డి చేసిన వ్యాఖ్యలపై ఆయన స్పందించారు. స్థానిక వ్యాపారులకు టీడీపీ ఎల్లప్పుడూ అండగా ఉంటుందని, వ్యక్తిగతంగా కూడా వ్యాపారుల సమస్యల పరిష్కారానికి తన వంతు సహకారం అందిస్తానని తెలిపారు.
“మాల్స్‌కు అనుమతులు ఎవరి హయాంలో?”
ప్రొద్దుటూరులో సీఎంఆర్‌ షాపింగ్‌ మాల్‌, డీమార్ట్‌, రిలయన్స్‌ మార్ట్‌ వంటి భారీ వాణిజ్య సంస్థలకు గతంలో అనుమతులు ఏ ప్రభుత్వ హయాంలో, ఎవరి పాలనలో లభించాయో ప్రజలకు వివరించాల్సిన బాధ్యత రాచమల్లు శివప్రసాద్‌రెడ్డిపై ఉందని ప్రవీణ్‌కుమార్‌రెడ్డి ప్రశ్నించారు.స్థానిక వస్త్ర వ్యాపారులు అభ్యంతరం వ్యక్తం చేసినప్పటికీ ఆయా సంస్థలకు అనుమతులు మంజూరయ్యాయని ఆయన ఆరోపించారు. ప్రస్తుతం వ్యాపారుల ఓట్లను దృష్టిలో పెట్టుకుని మాల్స్‌ అంశాన్ని రాజకీయంగా ప్రస్తావిస్తున్నారని విమర్శించారు.
“కరోనా సమయంలోనూ వ్యాపారుల నుంచి డబ్బులు వసూలు చేశారా?”
కరోనా సమయంలో దుకాణాలు తెరవడానికి అనుమతుల విషయంలో వ్యాపారుల నుంచి అక్రమంగా డబ్బులు వసూలు చేశారంటూ ప్రవీణ్‌కుమార్‌రెడ్డి ఆరోపించారు. ఈ ఆరోపణలపై సంబంధిత వాస్తవాలను ప్రజల ముందు ఉంచాలని డిమాండ్‌ చేశారు.ఎస్‌ఎస్‌ మాల్‌ విషయంలో ఒక దశలో అనుమతులు ఇచ్చి, అనంతరం దానితో తనకు సంబంధం లేదని చెప్పడం సమంజసం కాదన్నారు. గత ఎన్నికల్లో ఎదురైన పరాజయానికి కారణాలను రాచమల్లు ఆత్మపరిశీలన చేసుకోవాలని సూచించారు.
“నాయీ బ్రాహ్మణుల సమస్యలపై మాట్లాడే ముందు గతాన్ని గుర్తు చేసుకోవాలి”
నాయీ బ్రాహ్మణుల సమస్యలపై మాట్లాడుతున్న రాచమల్లు శివప్రసాద్‌రెడ్డి గతంలో తానే ఒక సెలూన్‌ను ప్రారంభించిన విషయాన్ని గుర్తు చేసుకోవాలని ప్రవీణ్‌కుమార్‌రెడ్డి అన్నారు. తన ఎమ్మెల్యే పదవీకాలంలో ప్రారంభమైన పలు దుకాణాలు ప్రస్తుతం మూతపడిన పరిస్థితిపై కూడా ఆయన ఆత్మపరిశీలన చేయాలని సూచించారు.
భారతి సిమెంట్‌ ఉద్యోగాలపై సవాల్‌
భారతి సిమెంట్‌ పరిశ్రమలో స్థానికులు, స్థానికేతరులకు ఎంతమందికి ఉద్యోగాలు లభించాయనే అంశంపై బహిరంగంగా పరిశీలించేందుకు తాను సిద్ధంగా ఉన్నానని ప్రవీణ్‌కుమార్‌రెడ్డి తెలిపారు. పరిశ్రమలో స్థానికుల కంటే స్థానికేతరులే అధికంగా పనిచేస్తున్నారన్నది తన ఆరోపణ అని పేర్కొన్నారు.
“కొత్త మాల్స్‌ వస్తే అడ్డుకునేందుకు కృషి చేస్తా”
ప్రొద్దుటూరులో భవిష్యత్తులో కొత్త షాపింగ్‌ మాల్స్‌ ఏర్పాటుకు ప్రయత్నాలు జరిగితే తన దృష్టికి తీసుకురావాలని స్థానిక వ్యాపారులకు ప్రవీణ్‌కుమార్‌రెడ్డి సూచించారు. స్థానిక వ్యాపారుల ప్రయోజనాలను కాపాడేందుకు, చట్టపరమైన పరిధిలో వాటిని అడ్డుకునేందుకు సాధ్యమైనంత వరకు కృషి చేస్తానని హామీ ఇచ్చారు.“స్థానిక వ్యాపారులు బలంగా ఉంటేనే ప్రొద్దుటూరు ఆర్థిక వ్యవస్థ బలపడుతుంది. చిన్న వ్యాపారులు, సంప్రదాయ వృత్తిదారుల జీవనోపాధిని దెబ్బతీసే నిర్ణయాలను మేము సమర్థించం. స్థానిక వ్యాపారుల ప్రయోజనాలే టీడీపీ లక్ష్యం” అని డాక్టర్‌ జి.వి. ప్రవీణ్‌కుమార్‌రెడ్డి స్పష్టం చేశారు.
