–ఆగస్టు 29 నుంచి మూడు రోజుల పాటు టోర్నమెంట్
–16 కళాశాలల జట్లు బరిలో.. విజేతకు రూ.30 వేలు, రన్నరప్కు రూ.20 వేలు
సలాం ప్రొద్దుటూరు:
జాతీయ క్రీడా దినోత్సవాన్ని పురస్కరించుకుని కడప జిల్లా TNSF ఆధ్వర్యంలో నిర్వహించనున్న TNSF క్రికెట్ టోర్నమెంట్–2026కు ఏర్పాట్లు పూర్తయ్యాయి. ఆగస్టు 29, 30, 31 తేదీల్లో ప్రొద్దుటూరు పాలిటెక్నిక్ కళాశాల క్రీడా మైదానంలో మూడు రోజుల పాటు పోటీలు జరగనున్నాయి. కడప జిల్లాలోని డిగ్రీ, పీజీ విద్యార్థుల్లో క్రీడా ప్రతిభను వెలికితీసి ప్రోత్సహించడమే లక్ష్యంగా టోర్నమెంట్ను నిర్వహిస్తున్నట్లు నిర్వాహకులు తెలిపారు.
16 జట్లు.. ఉత్కంఠభరిత పోటీలు
టోర్నమెంట్లో మొత్తం 16 కళాశాలల జట్లు పాల్గొంటున్నాయి. కే.ఎస్.ఆర్.ఎం., సీబీఐటీ, ఎస్.ఆర్.ఐ.టీ., అన్నమాచార్య, శ్రీనివాస, వైఎస్సార్, వాగ్దేవి, ఎస్వీ ఇంజినీరింగ్ కళాశాలలతో పాటు ఎస్బీవీఆర్, ఎస్వీడీసీ, పరమేశ్వర, నాగభూషణం, కడప ఆర్ట్స్ డిగ్రీ కళాశాలలు, యోగి వేమన యూనివర్సిటీ, ప్రొద్దుటూరు వెటర్నరీ కళాశాల జట్లు బరిలోకి దిగనున్నాయి.
రిజిస్ట్రేషన్లను First Come, First Served ప్రాతిపదికన పూర్తి చేసినట్లు TNSF జిల్లా అధ్యక్షులు బొజ్జ తిరుమలేష్ వెల్లడించారు.
కెప్టెన్లతో నియమ నిబంధనలపై చర్చ
టోర్నమెంట్ నిర్వహణకు సంబంధించి గురువారం ప్రొద్దుటూరు పాలిటెక్నిక్ కళాశాల గ్రౌండ్లో ఎంపికైన జట్ల కెప్టెన్లతో TNSF బృందం, మ్యాచ్ రిఫరీలు సమావేశమయ్యారు. మ్యాచ్ల నిర్వహణ, నిబంధనలు, క్రీడా స్ఫూర్తి, పోటీలను పారదర్శకంగా నిర్వహించే విధానాలపై చర్చించారు.
అనంతరం నిర్వహించిన విలేకరుల సమావేశంలో తిరుమలేష్ మాట్లాడుతూ విద్యార్థుల సమగ్ర అభివృద్ధికి విద్యతో పాటు క్రీడలు కూడా అత్యంత కీలకమని పేర్కొన్నారు. క్రీడల ద్వారా శారీరక దృఢత్వంతో పాటు మానసిక ఉల్లాసం, క్రమశిక్షణ, నాయకత్వ లక్షణాలు, టీమ్వర్క్, ఆత్మవిశ్వాసం పెరుగుతాయని తెలిపారు.
విజేతలకు భారీ నగదు బహుమతులు
టోర్నమెంట్లో విజేతగా నిలిచే జట్టుకు రూ.30,000 నగదు బహుమతి, రన్నరప్ జట్టుకు రూ.20,000 నగదు బహుమతి అందజేయనున్నట్లు నిర్వాహకులు తెలిపారు. దీంతో కళాశాల జట్ల మధ్య పోటీ మరింత ఆసక్తికరంగా మారనుంది.
29న ఘనంగా ప్రారంభోత్సవం
టోర్నమెంట్ ప్రారంభోత్సవం ఆగస్టు 29న ప్రొద్దుటూరు ఎమ్మెల్యే నంద్యాల వరదరాజుల రెడ్డి, తెలుగుదేశం పార్టీ జిల్లా అధ్యక్షులు చదిపిరాళ్ల భూపేష్ సుబ్బరామిరెడ్డి చేతుల మీదుగా నిర్వహించనున్నట్లు తెలిపారు. యువ నాయకులు నంద్యాల కొండారెడ్డి సారథ్యంలో కార్యక్రమాలు కొనసాగనున్నాయి.
క్రీడాకారులకు ప్రోత్సాహం ఇవ్వాలి
జిల్లాలోని విద్యార్థులు, యువత అధిక సంఖ్యలో హాజరై క్రీడాకారులను ప్రోత్సహించాలని తిరుమలేష్ కోరారు. విద్యార్థుల్లో క్రీడాస్ఫూర్తిని పెంపొందించడంతో పాటు ప్రతిభావంతులైన క్రీడాకారులకు ప్రోత్సాహం అందించేందుకు ఈ టోర్నమెంట్ వేదికగా నిలుస్తుందని తెలిపారు.
ఈ కార్యక్రమంలో TNSF జిల్లా ప్రధాన కార్యదర్శి చేతన్ కుమార్ రెడ్డి, ఉపాధ్యక్షుడు సిద్ధార్థ రాయల్, కార్యదర్శులు వంశీధర్, శ్రీనివాసులు రెడ్డి, రామాంజనేయులు రెడ్డి, బాలు, హర్ష, అధికార ప్రతినిధి మహేష్ తదితరులు పాల్గొన్నారు.
