సలాం ప్రొద్దుటూరు:
ఆంధ్రప్రదేశ్ రాజకీయాల్లో ఆసక్తికరంగా మారిన రాజ్యసభ ఎన్నికల నేపథ్యంలో జనసేన పార్టీ అభ్యర్థిగా లింగమనేని రమేష్ నామినేషన్ దాఖలు చేశారు. నామినేషన్ అనంతరం మీడియాతో మాట్లాడిన ఆయన, తనకు ఈ అవకాశం కల్పించిన జనసేన అధ్యక్షుడు, ఉప ముఖ్యమంత్రి పవన్ కళ్యాణ్‌కు ప్రత్యేకంగా కృతజ్ఞతలు తెలిపారు. తనపై నమ్మకం ఉంచి రాజ్యసభ అభ్యర్థిత్వం ఇచ్చిన పార్టీ నాయకత్వానికి జీవితాంతం రుణపడి ఉంటానని పేర్కొన్నారు. అలాగే తన అభ్యర్థిత్వానికి మద్దతు తెలిపిన ప్రధానమంత్రి నరేంద్ర మోదీ, ముఖ్యమంత్రి నారా చంద్రబాబు నాయుడుకు కూడా ధన్యవాదాలు తెలియజేశారు. రాజ్యసభ సభ్యుడిగా ఎన్నికైన తర్వాత రాష్ట్రానికి సంబంధించిన అంశాలను దేశ అత్యున్నత సభలో బలంగా ప్రస్తావిస్తానని చెప్పారు. ఆంధ్రప్రదేశ్ అభివృద్ధి, ప్రజల సంక్షేమం, రాష్ట్రానికి రావాల్సిన హక్కులు, కేంద్ర సహకారం వంటి అంశాలపై నిరంతరం కృషి చేస్తానని స్పష్టం చేశారు. ప్రజా సమస్యల పరిష్కారమే తన ప్రధాన లక్ష్యమని, రాష్ట్ర ప్రయోజనాల విషయంలో ఎలాంటి రాజీ ఉండదని అన్నారు.. ఇదే సందర్భంగా జనసేన పార్టీ ప్రధాన కార్యదర్శి, ఎమ్మెల్సీ నాగబాబు మాట్లాడుతూ లింగమనేని రమేష్ ఎంపికపై సంతోషం వ్యక్తం చేశారు. జనసేన పార్టీ తరఫున రాజ్యసభకు వెళ్లడానికి ఆయన సరైన వ్యక్తి అని కొనియాడారు. సామాజిక, వ్యాపార, ప్రజా రంగాల్లో అనుభవం ఉన్న రమేష్ రాష్ట్ర ప్రయోజనాల కోసం సమర్థవంతంగా పనిచేస్తారనే నమ్మకం ఉందన్నారు. పార్టీ శ్రేణుల ఆకాంక్షలకు అనుగుణంగా ఈ నిర్ణయం తీసుకున్నామని నాగబాబు పేర్కొన్నారు. జనసేన కార్యకర్తలు, నాయకులు అందరూ ఈ ఎంపిక పట్ల ఆనందంగా ఉన్నారని చెప్పారు. రాజ్యసభలో జనసేన స్వరం మరింత బలంగా వినిపించేందుకు లింగమనేని రమేష్ పాత్ర కీలకంగా ఉంటుందని అభిప్రాయపడ్డారు. రాజ్యసభ ఎన్నికల నేపథ్యంలో కూటమి పార్టీల మధ్య సమన్వయం, పరస్పర మద్దతు మరోసారి స్పష్టమైందని రాజకీయ వర్గాలు విశ్లేషిస్తున్నాయి. జనసేన తరఫున లింగమనేని రమేష్ అభ్యర్థిత్వం ఖరారవడం ద్వారా రాష్ట్ర ప్రయోజనాల కోసం ఢిల్లీలో మరింత బలమైన ప్రాతినిధ్యం లభిస్తుందనే ఆశాభావం వ్యక్తమవుతోంది.
