–నియామకాలు పొందిన అభ్యర్థులే రోడ్డెక్కారు..
–తప్పుడు ఆరోపణలను తిప్పికొట్టేందుకు ఛలో కర్నూలు
సలాం ప్రొద్దుటూరు :
మెగా డీఎస్సీ–2025 నియామకాలపై కొందరు చేస్తున్న తప్పుడు ప్రచారం, నిరాధార ఆరోపణలకు తెరదించేందుకు అభ్యర్థులు స్వయంగా రంగంలోకి దిగారు. తమకు లభించిన ఉపాధ్యాయ ఉద్యోగాలపై జరుగుతున్న దుష్ప్రచారాన్ని ఖండిస్తూ ‘ఆత్మగౌరవ ర్యాలీ’ నిర్వహించేందుకు ప్రొద్దుటూరు నియోజకవర్గం నుంచి 42 మంది మెగా డీఎస్సీ అభ్యర్థులు కర్నూలుకు తరలివెళ్లారు.
కర్నూలు కొండారెడ్డి బురుజు వద్ద నిర్వహించిన ఆత్మగౌరవ ర్యాలీలో పాల్గొని మెగా డీఎస్సీ నియామకాలపై జరుగుతున్న తప్పుడు ప్రచారాన్ని ప్రజల ముందు ఎండగట్టాలని అభ్యర్థులు నిర్ణయించారు. ఉద్యోగాలు పొందిన అభ్యర్థులే తమ నియామకాలపై జరుగుతున్న ప్రచారాన్ని ఖండిస్తూ బహిరంగంగా ముందుకు రావడం ఈ అంశంపై వారి వైఖరిని స్పష్టం చేస్తోందని వారు పేర్కొన్నారు.
హామీ అమలు చేసిన ప్రభుత్వానికి అభ్యర్థుల సంఘీభావం
మెగా డీఎస్సీ–2025 ద్వారా వేలాది మంది అభ్యర్థులకు ఉపాధ్యాయ ఉద్యోగాలు కల్పించేందుకు ప్రభుత్వం చర్యలు చేపట్టిందని, ఇచ్చిన హామీని అమలు చేసిన ప్రభుత్వానికి సంఘీభావంగా నిలబడేందుకే ఈ ర్యాలీలో పాల్గొంటున్నామని అభ్యర్థులు తెలిపారు. ఉద్యోగ నియామకాలపై రాజకీయ ప్రయోజనాల కోసం తప్పుడు ఆరోపణలు చేయడం వల్ల ఇప్పటికే ఉద్యోగాలు పొందిన అభ్యర్థుల ఆత్మస్థైర్యాన్ని దెబ్బతీయవద్దని వారు కోరారు.
‘ఆధారాలుంటే చూపండి.. ఆరోపణలు కాదు’
మెగా డీఎస్సీ నియామకాలపై ఆరోపణలు చేస్తున్న వారు ఆధారాలతో ముందుకు రావాలని, నిరాధార ప్రచారంతో వేలాది మంది అభ్యర్థుల భవిష్యత్తుతో ఆటలాడవద్దని అభ్యర్థులు స్పష్టం చేశారు. నియామక ప్రక్రియపై ఏవైనా అభ్యంతరాలు ఉంటే చట్టబద్ధమైన మార్గాల్లో ప్రశ్నించాలి తప్ప, ఉద్యోగాలు పొందిన అభ్యర్థులను లక్ష్యంగా చేసుకుని దుష్ప్రచారం చేయడం సమంజసం కాదన్నారు.
ప్రొద్దుటూరు నుంచి సంఘటితంగా తరలింపు
ప్రొద్దుటూరు నియోజకవర్గ ఎమ్మెల్యే నంద్యాల వరదరాజుల రెడ్డి ఆధ్వర్యంలో 42 మంది మెగా డీఎస్సీ అభ్యర్థులు కర్నూలు ర్యాలీకి బయలుదేరారు. కార్యక్రమానికి సమన్వయకర్తగా మార్కెట్ కమిటీ వైస్ చైర్మన్ పట్నం లక్ష్మణ్ కుమార్ వ్యవహరించారు. ఈ సందర్భంగా అభ్యర్థులకు అవసరమైన సమన్వయం చేపట్టారు.
ఈ కార్యక్రమంలో టీడీపీ కడప పార్లమెంట్ ప్రధాన కార్యదర్శి వై.ఎస్. జబీవుల్లా పాల్గొని అభ్యర్థులకు మద్దతు తెలిపారు.
“ఉద్యోగాలు పొందిన అభ్యర్థుల ఆత్మగౌరవాన్ని దెబ్బతీసే ప్రచారాన్ని సహించేది లేదు.. వాస్తవాలను ప్రజల ముందు ఉంచుతాం” అంటూ అభ్యర్థులు స్పష్టం చేశారు. మెగా డీఎస్సీ నియామకాలపై తప్పుడు ప్రచారానికి ముగింపు పలికి, నియామక ప్రక్రియపై వాస్తవాలను మాత్రమే ప్రజల ముందుకు తీసుకురావాలని వారు డిమాండ్ చేశారు.
