–డీలిమిటేషన్కు తుది ముద్ర.. గెజిట్లో అధికారిక ప్రకటన
–వార్డు సరిహద్దులు ఖరారు.. ఎన్నికల ప్రక్రియకు కీలక అడుగు
సలాం ప్రొద్దుటూరు :
ప్రొద్దుటూరు మున్సిపాలిటీ వార్డుల పునర్విభజనకు తుది ముద్ర పడింది. మున్సిపాలిటీని 52 వార్డులుగా విభజిస్తూ ప్రభుత్వం తుది డీలిమిటేషన్ను ఖరారు చేసింది. దీంతో ప్రొద్దుటూరు పట్టణంలోని వార్డుల సంఖ్య, వాటి పరిధులకు సంబంధించిన ప్రక్రియ అధికారికంగా పూర్తయింది.ఈ మేరకు ఆంధ్రప్రదేశ్ ప్రభుత్వం, మున్సిపల్ పరిపాలన మరియు పట్టణాభివృద్ధి శాఖ కమిషనర్ & డైరెక్టర్ ఆఫ్ మున్సిపల్ అడ్మినిస్ట్రేషన్, రాయపూడి వారి ROC.No.13033/123/2026/H1 ద్వారా తుది ఉత్తర్వులు జారీ చేశారు.
52 వార్డులకు తుది రూపం
ఆంధ్రప్రదేశ్ మున్సిపాలిటీల (నగర పంచాయతీలు మరియు మున్సిపాలిటీలను వార్డులుగా విభజించడం) నియమాలు–1994లోని రూల్–13 ప్రకారం ప్రొద్దుటూరు మున్సిపాలిటీ వార్డుల పునర్విభజన ప్రక్రియను అధికారులు పూర్తి చేశారు.ఇప్పటివరకు కొనసాగిన డీలిమిటేషన్ ప్రక్రియలో ప్రతిపాదిత మార్పులు, పరిశీలనలు తదితర ప్రక్రియలను పూర్తి చేసిన అనంతరం 52 వార్డుల తుది నిర్మాణాన్ని ప్రభుత్వం ఆమోదించింది.
ఫారం–VIలో పూర్తి వివరాలు
ప్రొద్దుటూరు మున్సిపాలిటీకి సంబంధించిన 52 వార్డుల తుది పునర్విభజన వివరాలను ఫారం–VIలో పొందుపరిచారు. ఈ తుది వివరాలు ఆంధ్రప్రదేశ్ గెజిట్లో ప్రచురితమయ్యాయి.ప్రజలు తమ వార్డు ఏ ప్రాంతాల వరకు విస్తరించింది? తమ నివాస ప్రాంతం ఏ వార్డులోకి వచ్చింది? వంటి వివరాలను తెలుసుకునే అవకాశం కల్పించారు.
నోటీసు బోర్డులపై వివరాల ప్రదర్శన
ప్రజల సౌకర్యార్థం తుది డీలిమిటేషన్ వివరాలను ప్రొద్దుటూరు తహసీల్దార్ కార్యాలయం, జమ్మలమడుగు రెవెన్యూ డివిజనల్ అధికారి కార్యాలయం, ప్రొద్దుటూరు మున్సిపల్ కార్యాలయం నోటీసు బోర్డులపై ప్రదర్శించినట్లు అధికారులు తెలిపారు.
ఓటర్లకు కీలక సూచన
వార్డుల పునర్విభజన తుది కావడంతో ప్రొద్దుటూరు పట్టణ ప్రజలు, ముఖ్యంగా ఓటర్లు, తమ వార్డు నంబర్, వార్డు పరిధి, సరిహద్దులను తప్పనిసరిగా పరిశీలించుకోవాలని అధికారులు సూచిస్తున్నారు.మున్సిపల్ ఎన్నికలు, వార్డు ప్రాతినిధ్యం, స్థానిక సంస్థల పరిపాలన వంటి అంశాలకు వార్డుల డీలిమిటేషన్ కీలకం కావడంతో 52 వార్డుల తుది ప్రకటన ప్రొద్దుటూరు పట్టణ రాజకీయ, పరిపాలనా వ్యవస్థలో ప్రాధాన్యత సంతరించుకుంది.52 వార్డులు.. కొత్త వార్డు సరిహద్దులు.. ఎన్నికల ప్రక్రియకు కీలక ముందడుగు — ప్రొద్దుటూరు మున్సిపాలిటీ డీలిమిటేషన్కు అధికారికంగా ముగింపు పలికింది.
