–ప్రజా సమస్యల పరిష్కారమే లక్ష్యంగా క్షేత్రస్థాయి పర్యవేక్షణ
–ఉదయం 4 గంటలకే మున్సిపల్ సిబ్బందితో కలిసి డ్రైనేజీ పరిస్థితుల పరిశీలన
– ఆక్రమణల తొలగింపునకు కార్యాచరణ
సలాం ప్రొద్దుటూరు:
ప్రజా సమస్యలు ఎదురైనప్పుడు కార్యాలయాలకే పరిమితం కాకుండా క్షేత్రస్థాయిలోకి వెళ్లి పరిస్థితులను స్వయంగా పరిశీలించడం ద్వారా ప్రొద్దుటూరు మున్సిపల్ కమిషనర్ తూతిక శ్రీనివాస విశ్వనాథ్ తన విధి నిర్వహణ పట్ల నిబద్ధతను చాటుకున్నారు. పట్టణంలో వర్షపు నీరు నిలిచిన ప్రాంతాలను పరిశీలించేందుకు మంగళవారం తెల్లవారుజామున 4 గంటలకే మున్సిపల్ సిబ్బందితో కలిసి ఆయన రంగంలోకి దిగారు.వర్షం పడిన వెంటనే ప్రజలకు ఎదురయ్యే ఇబ్బందులను గుర్తించి, వాటి పరిష్కారానికి అధికారులు సమయపాలనతో స్పందించాలనే సందేశాన్ని కమిషనర్ పర్యటన చాటిచెప్పింది.
ఉదయం 4 గంటలకే క్షేత్రస్థాయిలో పర్యవేక్షణ
పట్టణంలోని పలు ప్రాంతాల్లో పర్యటించిన కమిషనర్ డ్రైన్లలో వర్షపు నీటి ప్రవాహాన్ని స్వయంగా పరిశీలించారు. నీరు ఎక్కడ నిలిచింది..? ఎందుకు నిలిచింది..? డ్రైన్లలో నీటి ప్రవాహానికి ఎక్కడెక్కడ ఆటంకాలు ఏర్పడుతున్నాయి..? అనే అంశాలపై అధికారులను అడిగి వివరాలు తెలుసుకున్నారు.పలు ప్రాంతాల్లో డ్రైన్ల ఆక్రమణలు, ప్లాస్టిక్ వ్యర్థాలు, చెత్తాచెదారం పేరుకుపోవడం వల్ల వర్షపు నీటి ప్రవాహానికి అంతరాయం ఏర్పడుతున్నట్లు గుర్తించారు. వెంటనే సంబంధిత సిబ్బందిని అప్రమత్తం చేసి సిల్ట్, చెత్తాచెదారం తొలగింపు పనులు చేపట్టాలని ఆదేశించారు.
కుర్చీలో కూర్చుని ఆదేశాలు కాదు.. క్షేత్రస్థాయిలోనే పరిశీలన
మున్సిపల్ పరిపాలనలో సమస్యల తీవ్రతను ప్రత్యక్షంగా తెలుసుకోవడానికి క్షేత్రస్థాయి పర్యవేక్షణే కీలకం. ఈ నేపథ్యంలో కమిషనర్ తెల్లవారుజామునే స్వయంగా ప్రాంతాల్లో పర్యటించడం ద్వారా అధికారుల పర్యవేక్షణకు కొత్త కార్యాచరణ శైలిని చూపించారు.వర్షపు నీటి ప్రవాహం, డ్రైనేజీ వ్యవస్థ, పారిశుధ్య పరిస్థితులను ప్రత్యక్షంగా పరిశీలించి, సమస్యల పరిష్కారానికి తక్షణ చర్యలు చేపట్టేలా సిబ్బందిని సమన్వయం చేశారు.
డ్రైన్ల ఆక్రమణలపై కఠిన చర్యలకు సిద్ధం
డ్రైన్లను ఆక్రమించి నిర్మాణాలు చేపట్టడం, బంకులు ఏర్పాటు చేయడం వల్ల వర్షపు నీటి ప్రవాహానికి ఆటంకం ఏర్పడుతున్న నేపథ్యంలో ఆక్రమణలపై దృష్టి సారించారు. పట్టణంలోని ప్రధాన డ్రైన్లు, వర్షపు నీటి ప్రవాహ మార్గాలపై ఉన్న అక్రమ కట్టడాలు, బంకులను గుర్తించి దశలవారీగా తొలగించేందుకు కార్యాచరణ ప్రణాళిక సిద్ధం చేయాలని టౌన్ ప్లానింగ్ అధికారులను ఆదేశించారు.ఆక్రమణదారులు స్వచ్ఛందంగా వాటిని తొలగించుకోవాలని, లేకపోతే మున్సిపల్ నిబంధనల ప్రకారం చర్యలు తీసుకుంటామని స్పష్టం చేశారు.
ప్రజల సహకారంతోనే పరిశుభ్రమైన పట్టణం
డ్రైన్లలో ప్లాస్టిక్, చెత్తాచెదారం వేయకుండా ప్రజలు సహకరించాలని కమిషనర్ కోరారు. వర్షపు నీరు సజావుగా ప్రవహించేలా పారిశుధ్య పనులు నిరంతరం కొనసాగించాలని అధికారులను ఆదేశించారు.
విధి నిర్వహణలో నిబద్ధతకు నిదర్శనం
ప్రజలకు ఇబ్బంది కలిగించే సమస్యను కార్యాలయానికి చేరే ఫిర్యాదు కోసం ఎదురుచూడకుండా, తెల్లవారుజామునే స్వయంగా క్షేత్రస్థాయికి చేరుకుని పరిస్థితిని పరిశీలించడం కమిషనర్ విధి నిర్వహణ పట్ల చూపుతున్న చొరవకు నిదర్శనంగా నిలిచింది.ప్రజా సమస్యల పరిష్కారంలో సమయపాలన, ప్రత్యక్ష పర్యవేక్షణ, అధికారుల సమన్వయం ఉంటే పట్టణ పరిపాలన మరింత సమర్థవంతంగా సాగుతుందనే సందేశాన్ని ఆయన ఉదయపు పర్యటన చాటిచెప్పింది.“ప్రజలకు ఇబ్బంది కలిగే సమస్యలను ముందుగానే గుర్తించి పరిష్కరించడమే లక్ష్యం” అన్న విధానంతో మున్సిపల్ యంత్రాంగాన్ని క్షేత్రస్థాయిలో మరింత చురుగ్గా పనిచేసేలా కమిషనర్ దిశానిర్దేశం చేస్తున్నారు.
