–ప్రారంభ దశలోనే వ్యాధులను గుర్తించి చికిత్స పొందాలి: డా. గీత
సలాం ప్రొద్దుటూరు:
ప్రజలకు మెరుగైన వైద్య సేవలు అందించాలనే లక్ష్యంతో “సేవా సంకల్ప్ అభియాన్” కార్యక్రమంలో భాగంగా శ్రీరాములపేట పట్టణ ప్రాథమిక ఆరోగ్య కేంద్రంలో ఉచిత వైద్య శిబిరాన్ని గురువారం నిర్వహించారు.ఈ శిబిరంలో ప్రజలకు సాధారణ ఆరోగ్య పరీక్షలతో పాటు రక్తపోటు, మధుమేహం తదితర పరీక్షలు నిర్వహించారు. వైద్యులు ప్రజల ఆరోగ్య సమస్యలను పరిశీలించి, అవసరమైన వారికి ఉచితంగా మందులు అందించారు.
ఆరోగ్యంపై నిర్లక్ష్యం వద్దు
ఈ సందర్భంగా ఉప జిల్లా వైద్య, ఆరోగ్యశాఖాధికారి డా. గీత మాట్లాడుతూ అసంక్రమణ వ్యాధులు, రక్తహీనత, పోషకాహారం, మాతా–శిశు ఆరోగ్యం, వ్యక్తిగత పరిశుభ్రత, కుటుంబ నియంత్రణ, సీజనల్ వ్యాధుల నివారణ వంటి అంశాలపై ప్రజలకు అవగాహన అవసరమన్నారు.ప్రజలు తమ ఆరోగ్యం పట్ల నిర్లక్ష్యం చేయకుండా క్రమం తప్పకుండా ఆరోగ్య పరీక్షలు చేయించుకోవాలని సూచించారు. ముఖ్యంగా రక్తపోటు, మధుమేహం, క్యాన్సర్ వంటి వ్యాధులను ప్రారంభ దశలోనే గుర్తించి తగిన చికిత్స పొందితే అనేక ఆరోగ్య సమస్యలను నివారించవచ్చని తెలిపారు.
వైద్య సిబ్బంది పాల్గొనడం
కార్యక్రమంలో వైద్యాధికారులు డా. మధు కుమార్, డా. మురళీకృష్ణారెడ్డి, గైనకాలజిస్ట్ డా. జయసత్య, ఆప్తాల్మిక్ ఆఫీసర్ రఘురామిరెడ్డి, డిప్యూటీ హెల్త్ ఎడ్యుకేషన్ ఆఫీసర్ వెంకటేశ్వర్లుతో పాటు ఆరోగ్య సిబ్బంది పాల్గొన్నారు.
