–చంద్రబాబు నిజాయితీ ముందు కుట్రలు చిత్తు
–సెప్టెంబర్ 9 రాష్ట్ర చరిత్రలో చీకటి రోజు..
–టీడీపీ పట్టణ అధ్యక్షుడు చల్లా రాజగోపాల్ యాదవ్
సలాం ప్రొద్దుటూరు:
“నిజం ఎప్పటికీ ఓడిపోదు.. న్యాయం ఎవరికీ తలవంచదు.. చంద్రబాబు నాయుడు నిజాయితీ గెలిచింది” అని టీడీపీ పట్టణ అధ్యక్షుడు చల్లా రాజగోపాల్ యాదవ్ అన్నారు. చంద్రబాబు నాయుడు అరెస్టయిన సెప్టెంబర్ 9ను రాష్ట్ర చరిత్రలో చీకటి రోజుగా అభివర్ణిస్తూ, టీడీపీ కార్యాలయం వద్ద నిర్వహించిన కార్యక్రమంలో ఆయన మాట్లాడారు.“చంద్రబాబు నిజాయితీ గెలిచింది.. న్యాయం నిలిచింది.. చివరకు నిజమే గెలిచింది” అని టీడీపీ పట్టణ అధ్యక్షుడు చల్లా రాజగోపాల్ యాదవ్ అన్నారు. చంద్రబాబు నాయుడు అరెస్టయిన నాటి చీకటి రోజును గుర్తుచేసుకుంటూ, ఎమ్మెల్యే నంద్యాల వరదరాజుల రెడ్డి ఆదేశాల మేరకు ప్రొద్దుటూరు టీడీపీ కార్యాలయం వద్ద కొవ్వొత్తులు వెలిగించి సంఘీభావ కార్యక్రమం నిర్వహించారు.
చంద్రబాబు నాయుడు నాలుగున్నర దశాబ్దాల రాజకీయ ప్రస్థానంలో నిబద్ధత, నిజాయితీతో ప్రజలకు సేవ చేశారని చల్లా రాజగోపాల్ యాదవ్ పేర్కొన్నారు. ప్రజా సమస్యలపై నిరంతరం పోరాడుతూ, ప్రజల పక్షాన నిలిచిన చంద్రబాబును రాజకీయ కక్షతోనే అక్రమ కేసుల్లో ఇరికించారని ఆయన ఆరోపించారు.
చంద్రబాబు అరెస్టును నిరసిస్తూ రెండు తెలుగు రాష్ట్రాలతో పాటు ప్రపంచవ్యాప్తంగా ఉన్న తెలుగువారంతా ఏకతాటిపైకి వచ్చి ఆయనకు అండగా నిలిచారని గుర్తుచేశారు. 53 రోజుల పాటు రాజమండ్రి జైలులో చంద్రబాబును నిర్బంధించిన ఘటనను తెలుగు ప్రజలు ఎప్పటికీ మరిచిపోరని అన్నారు.
“చంద్రబాబు నిప్పులాంటి నిజాయితీ దేశ ప్రజలందరికీ తెలుసు. ఆయనను రాజకీయంగా అణగదొక్కాలని ఎన్ని ప్రయత్నాలు చేసినా ప్రజాబలం ముందు అవన్నీ నిలవలేదు. 2024 ఎన్నికల్లో ప్రజలు ఇచ్చిన తీర్పే దీనికి నిదర్శనం” అని చల్లా రాజగోపాల్ యాదవ్ అన్నారు.
ప్రస్తుత కూటమి ప్రభుత్వం రాష్ట్ర అభివృద్ధి, సంక్షేమాన్ని లక్ష్యంగా ముందుకు సాగుతోందని తెలిపారు. అమరావతి, పోలవరం, వెలిగొండ, పట్టిసీమ వంటి అభివృద్ధి ప్రాజెక్టులను వేగంగా ముందుకు తీసుకెళ్లేందుకు ప్రభుత్వం కృషి చేస్తోందన్నారు. నిరుద్యోగ యువతకు ఉద్యోగ అవకాశాలు కల్పించే దిశగా డీఎస్సీ నియామకాలను చేపట్టడం అభినందనీయమని పేర్కొన్నారు.
ప్రభుత్వ అభివృద్ధి, సంక్షేమ కార్యక్రమాలపై సోషల్ మీడియాలో తప్పుడు ప్రచారాలు చేస్తూ ప్రజలను తప్పుదోవ పట్టించే ప్రయత్నాలు జరుగుతున్నాయని ఆయన ఆరోపించారు. “న్యాయానికి ఓటమి ఉండదు.. న్యాయానిదే అంతిమ విజయం. చంద్రబాబు నాయుడు విషయంలో ఇది మరోసారి స్పష్టమైంది” అని అన్నారు. ముఖ్యమంత్రి చంద్రబాబు నాయుడు నాయకత్వంలో రాష్ట్రాన్ని అభివృద్ధి పథంలో ముందుకు తీసుకెళ్లేందుకు ప్రతి ఒక్కరూ భాగస్వాములు కావాలని చల్లా రాజగోపాల్ యాదవ్ పిలుపునిచ్చారు.
కార్యక్రమంలో మాజీ ఎంపీపీ నంద్యాల రాఘవరెడ్డి, టీడీపీ నాయకులు, కార్యకర్తలు, నందమూరి అభిమానులు పాల్గొన్నారు. ఈ సందర్భంగా కొవ్వొత్తులు వెలిగించి చంద్రబాబు అరెస్టు నాటి ఘటనను గుర్తుచేసుకున్నారు.
