–బీసీ నాయకులను బెదిరించే ధోరణిని సహించం: బుర్రి రెడ్డయ్య యాదవ్
సలాం ప్రొద్దుటూరు:
ప్రొద్దుటూరు నియోజకవర్గంలో వైఎస్సార్సీపీ రాష్ట్ర అధికార ప్రతినిధి రాచమల్లు శివప్రసాద్రెడ్డి చేసిన వ్యాఖ్యలపై కడప జిల్లా యాదవ సంఘం అధ్యక్షుడు బుర్రి రెడ్డయ్య యాదవ్ తీవ్రంగా స్పందించారు. బీసీ వర్గాలకు చెందిన నాయకుల పట్ల బెదిరింపు ధోరణి సరికాదని ఆయన పేర్కొంటూ రాచమల్లు వైఖరిని తీవ్రంగా ఖండించారు.రాచమల్లు శివప్రసాద్రెడ్డి వ్యవహారశైలి కారణంగా బీసీ వర్గాలకు చెందిన నాయకులు ఇబ్బందులు ఎదుర్కొంటున్నారని రెడ్డయ్య యాదవ్ ఆరోపించారు. ప్రొద్దుటూరులో బీసీ వర్గాల నాయకత్వం బలపడటాన్ని కొందరు జీర్ణించుకోలేకపోతున్నారని ఆయన విమర్శించారు.ఇటీవల చల్లా రాజగోపాల్ను ఉద్దేశించి “నాలుక కోస్తా” అంటూ రాచమల్లు చేసినట్లు పేర్కొంటున్న వ్యాఖ్యలను ఆయన తీవ్రంగా ఖండించారు. ప్రజాస్వామ్య వ్యవస్థలో రాజకీయ విభేదాలను ప్రజాస్వామ్య పద్ధతుల్లో వ్యక్తం చేయాలే తప్ప, బెదిరింపులకు పాల్పడటం సమంజసం కాదని అన్నారు.గతంలో చోటుచేసుకున్న నందం సుబ్బయ్య హత్య ఘటనను కూడా ఈ సందర్భంగా బుర్రి రెడ్డయ్య యాదవ్ ప్రస్తావించారు. సుబ్బయ్య హత్యకు సంబంధించి పలు అనుమానాలు, ఆరోపణలు ఉన్నాయని, ఈ వ్యవహారంపై సమగ్ర దర్యాప్తు ద్వారా వాస్తవాలను వెలుగులోకి తీసుకురావాల్సిన అవసరం ఉందన్నారు. అయితే ఈ కేసుకు సంబంధించి ఎవరి ప్రమేయం ఉందనే అంశాన్ని దర్యాప్తు, న్యాయ ప్రక్రియల ద్వారానే తేల్చాలని ఆయన పేర్కొన్నారు.2024 ఎన్నికల్లో వైఎస్సార్సీపీకి ప్రజలు ఇచ్చిన తీర్పును ఆ పార్టీ నాయకులు గుర్తుంచుకోవాలని, ప్రజల మనోభావాలకు అనుగుణంగా రాజకీయ భాష, వ్యవహారశైలిని మార్చుకోవాలని రెడ్డయ్య యాదవ్ సూచించారు.
సిట్ దర్యాప్తుకు డిమాండ్
నందం సుబ్బయ్య హత్య కేసును సమగ్రంగా పునఃపరిశీలించి సిట్ ద్వారా దర్యాప్తు చేయాలని ముఖ్యమంత్రి నారా చంద్రబాబు నాయుడిని బుర్రి రెడ్డయ్య యాదవ్ కోరారు.బీసీ నాయకులను బెదిరించడం, అవమానించడం వంటి చర్యలను సహించబోమని, అవసరమైతే ప్రజాస్వామ్యబద్ధంగా, చట్టపరంగా ఎదుర్కొంటామని బుర్రి రెడ్డయ్య యాదవ్ స్పష్టం చేశారు.